दोहाको सौक वाकिफमा ११औँ स्थानीय खजुर महोत्सव भव्य रूपमा सुरु, १२५ फार्मको सहभागिता।

आशिक हुसैन शेख दोहा, कतार । कतारको ऐतिहासिक तथा पर्यटकीय स्थल सौक वाकिफमा ११औँ स्थानीय खजुर महोत्सव भव्य रूपमा सुरु भएको छ। कतारको कृषि क्षेत्र र स्थानीय उत्पादनलाई प्रवर्द्धन गर्ने उद्देश्यले आयोजना गरिएको यस महोत्सवमा देशभरका १२५ वटा खजुर फार्महरूले सहभागिता जनाएका छन्।

महोत्सवमा कतारमा उत्पादन हुने विभिन्न जातका ताजा खजुर (रुताब) प्रदर्शनी तथा बिक्रीका लागि राखिएका छन्। स्थानीय किसानहरूले आफ्ना उत्कृष्ट उत्पादनहरू प्रत्यक्ष रूपमा उपभोक्ता र आगन्तुकहरूसम्म पुर्‍याउने अवसर पाएका छन्।

सौक वाकिफको इस्टर्न स्क्वायरमा आयोजना भइरहेको यो महोत्सव २५ जुलाईदेखि १० अगस्ट २०२६ सम्म सञ्चालन हुनेछ। यहाँ आगन्तुकहरूले विभिन्न प्रकारका स्वादिला खजुर अवलोकन तथा खरिद गर्न सक्नेछन् भने कतारको परम्परागत कृषि संस्कृतिबारे पनि जानकारी लिन सक्नेछन्।

आयोजकका अनुसार महोत्सवले कतारको स्थानीय कृषि उत्पादन, किसानहरूको मेहनत र राष्ट्रिय खाद्य सुरक्षाको अभियानलाई थप मजबुत बनाउने लक्ष्य राखेको छ।

खजुर कतारको संस्कृति र परम्परासँग गहिरो रूपमा जोडिएको महत्वपूर्ण उत्पादन हो। यस महोत्सवले स्थानीय किसान, व्यवसायी तथा सर्वसाधारणबीच सम्बन्ध विस्तार गर्ने महत्वपूर्ण अवसर प्रदान गरेको छ।

स्थान: सौक वाकिफ, इस्टर्न स्क्वायर, दोहा

समय: दैनिक साँझ ४ बजेदेखि राति ९ बजेसम्म।