भारत–नेपाल सीमामा व्यापार प्रभावित: नेपाली उपभोक्ता घट्दा सीमावर्ती व्यापारी निराश

नरेन्द्र महतो-सम्सी,

नेपाल–भारत सीमावर्ती क्षेत्रका व्यापारीहरू पछिल्लो समय गम्भीर रूपमा प्रभावित भएका छन्। स्थानीय व्यापारीका अनुसार नेपाली उपभोक्ताको आवागमन घटेसँगै व्यापारमा उल्लेखनीय गिरावट आएको छ। मुख्य कारणका रूपमा नेपाली रुपैयाँको कमजोर मूल्यलाई औंल्याइएको छ। उपभोक्ताहरू भन्छन्—पहिले जति रकमले किनमेल गर्न सकिन्थ्यो, अहिले त्यही सामान किन्न दोब्बर खर्च लाग्न थालेको छ। यसले गर्दा सीमापार किनमेल गर्ने नेपालीहरूको संख्या दिनदिनै घट्दै गएको छ।

सीमामा व्यवसाय गर्दै आएका व्यापारीहरूका अनुसार पहिले दैनिक ठूलो संख्यामा नेपाली ग्राहक आउने गर्थे, जसले व्यापारलाई चलायमान बनाएको थियो। तर अहिले अवस्था उल्टिएको छ—दैनिक व्यापार घटेको मात्र होइन, धेरै पसलहरू सुनसान जस्तै हुन थालेका छन्। यस अवस्थाले सीमावर्ती क्षेत्रको सानो तथा मध्यम व्यवसायमा प्रत्यक्ष असर परेको छ। व्यापारीहरू भन्छन्, “नेपाली ग्राहक नआउँदा हाम्रो व्यापार धराशायी जस्तै भएको छ, खर्च धान्नै मुस्किल पर्न थालेको छ।” अर्कोतर्फ, केही उपभोक्ताहरूले सीमामा हुने व्यवहार र अनावश्यक झन्झट पनि किनमेल घट्नुको अर्को कारण भएको बताएका छन्।

यसले गर्दा मानिसहरू सीमापार जानै छाड्न थालेका छन्। यदि यस अवस्थालाई समयमै सम्बोधन नगरेमा सीमावर्ती व्यापार अझै कमजोर हुने र स्थानीय अर्थतन्त्रमा नकारात्मक प्रभाव पर्ने चिन्ता व्यक्त गरिएको छ।