रस लाफान औद्योगिक क्षेत्रमा कारखानाभित्र विस्फोट, कुनै मानवीय क्षति भएको छैन

दोहा, असार ७ । कतारको रस लाफान औद्योगिक क्षेत्रमा रहेको एक कारखानाभित्र आइतबार राति करिब १०:३० बजे आन्तरिक विस्फोट भएको छ। घटनापछि कारखानाको केही भागमा आगलागी भए पनि कुनै मानवीय क्षति, घाइते वा ग्यास चुहावट नभएको कतारको गृह मन्त्रालयले जनाएको छ।

मन्त्रालयका अनुसार घटनाको जानकारी प्राप्त हुनासाथ नागरिक सुरक्षा तथा आपतकालीन उद्धार टोलीहरू घटनास्थलमा परिचालन गरिएका थिए। सुरक्षाकर्मीहरूले आगो नियन्त्रणमा लिएर प्रभावित क्षेत्रलाई सुरक्षित बनाएका छन्। साथै, सम्बन्धित निकायहरूले घटनास्थलमा सुरक्षा व्यवस्था कडा पार्दै थप अनुसन्धान अघि बढाइरहेका छन्।

सामाजिक सञ्जालमा कतिपय व्यक्तिहरूले कम्पन महसुस गरेको तथा घरका झ्याल–ढोका हल्लिएको उल्लेख गरेका छन्। तर हालसम्म कतारका आधिकारिक निकायहरूले सार्वजनिक गरेको जानकारीअनुसार घटनाबाट सर्वसाधारणको सुरक्षामा कुनै खतरा उत्पन्न भएको छैन।

प्रारम्भिक अनुसन्धानका आधारमा विस्फोट कारखानाभित्रकै प्राविधिक कारणले भएको हुन सक्ने अनुमान गरिएको छ। यद्यपि घटनाको वास्तविक कारणबारे सम्बन्धित प्राविधिक तथा सुरक्षा निकायहरूले विस्तृत अनुसन्धान गरिरहेका छन्।

रस लाफान कतारको महत्वपूर्ण ऊर्जा तथा प्राकृतिक ग्यास प्रशोधन केन्द्रमध्ये एक हो, जहाँबाट विश्वका विभिन्न मुलुकमा तरलीकृत प्राकृतिक ग्यास (LNG) निर्यात हुँदै आएको छ। घटनाका बाबजुद ऊर्जा आपूर्ति तथा सार्वजनिक सुरक्षामा कुनै असर नपरेको अधिकारीहरूले बताएका छन्।

कतारको गृह मन्त्रालयले सर्वसाधारण तथा सञ्चारमाध्यमलाई आधिकारिक निकायबाट प्राप्त जानकारीलाई मात्र आधार मानेर समाचार सम्प्रेषण गर्न आग्रह गरेको छ। कतारमा प्रचलित कानुन तथा सञ्चारसम्बन्धी नियमहरूको पूर्ण पालना गर्दै अपुष्ट सूचना, अफवाह वा अनुमानका आधारमा सामग्री प्रकाशन नगर्न समेत अनुरोध गरिएको छ।