नेपाली धनुक सेवा समाज कतारद्वारा पिकनिक तथा बनभोज कार्यक्रम सम्पन्न

फाल्गुण २ २०८२

आशिक हुसैन शेख, दोहा–कतार – दोहा, कतारमा क्रियाशील सामाजिक संस्था नेपाली धनुक सेवा समाज, दोहा कतार ले प्रवासमा रहेका नेपालीहरूबीच आपसी एकता, सद्भाव र भाइचारा अभिवृद्धि गर्ने उद्देश्यका साथ पिकनिक तथा बनभोज कार्यक्रम सम्पन्न गरेको छ।

कार्यक्रम १३ फेब्रुअरी २०२६, शुक्रबार समाल मजरा क्षेत्रमा आयोजना गरिएको थियो। कार्यक्रममा कतारमा रहेका धानुक समुदायका सदस्यहरू तथा शुभेच्छुकहरूको उल्लेखनीय सहभागिता रहेको थियो।

पिकनिक तथा बनभोजसँगै आपसी भेटघाट, मनोरञ्जनात्मक गतिविधि तथा सामाजिक अन्तरक्रियाले कार्यक्रमलाई सफल बनाएको आयोजकहरूले बताएका छन्। यसले प्रवासमा रहेर पनि समुदायबीचको सम्बन्धलाई थप मजबुत बनाउने विश्वास व्यक्त गरिएको छ।

कार्यक्रमको क्रममा संस्था र कार्यक्रमलाई सहयोग गर्ने सहयोगीहरूलाई सम्मान पत्र प्रदान गरी सम्मान गरिएको थियो। साथै कार्यसमितिका सदस्यहरूलाई पनि सम्मान पत्र प्रदान गरियो, जसले समुदायमा सेवा र योगदानको मूल्याङ्कन गरेको अनुभव प्रदान गर्‍यो।

संस्थाका अध्यक्ष अवधेश मण्डल ले कार्यक्रममा जानकारी दिँदै, कार्यक्रमले समुदायबीच आपसी समझदारी र सहयोगको भावना विकास गर्न सहयोग पुग्ने बताए। अध्यक्ष मण्डलले उक्त जानकारी महोत्तरी टुडे का पत्रकार आशिक हुसैन शेख लाई दिएका हुन्।

नेपाली धनुक सेवा समाज, दोहा कतार सन् २०१६ (स्थापना: २०७३) मा स्थापित सामाजिक संस्था हो। समाजले स्थापना कालदेखि नै सामाजिक सेवा, आपत–विपत् सहयोग, सांस्कृतिक संरक्षण तथा समुदायहितका विभिन्न कार्यक्रमहरू गर्दै आएको छ।

कार्यक्रममा सभापतित्व अवधेश मण्डल, प्रमुख अतिथि सुरेश मण्डल, विशिष्ट अतिथि जगत मण्डल, नेपाली समाज कतारका अध्यक्ष मनिष यादव, मधेश प्रदेश समन्वय परिषद कतारका वरिष्ठ उपाध्यक्ष दुर्गा नन्द पासवान, उपाध्यक्ष अजाद मन्सुर, मधेशी एकता समाज कतारका अध्यक्ष मोहम्मद अली हुसैन राइनो, समाजसेवी रामबाबु यादव, सिरहा सेवा समाज कतारका अध्यक्ष जयप्रकाश यादव लगायतको उपस्थित रहेको थियो।