राजेन्द्र महतो नेतृत्वको राष्ट्रिय मुक्ति पार्टीका उपाध्यक्ष राजीव झा रास्वपा प्रवेश

जनकपुरधाम। राजेन्द्र महतो नेतृत्वको राष्ट्रिय मुक्ति पार्टीका केन्द्रीय उपाध्यक्ष तथा धनुषा क्षेत्र नम्बर ३ का प्रतिनिधिसभा सदस्य उम्मेदवार राजीव झा राष्ट्रिय स्वतन्त्र पार्टी (रास्वपा) मा प्रवेश गरेका छन्। झा आज जनकपुरधाममा आयोजित एक विशेष समारोहबीच रास्वपामा प्रवेश गरेका हुन्।

उनीलाई रास्वपाका धनुषा क्षेत्र नम्बर ३ का उम्मेदवार मनिष झाले पार्टीमा स्वागत गरेका थिए। कार्यक्रममा रास्वपाका जिल्ला तथा प्रदेश तहका नेताहरूको समेत उपस्थिति रहेको थियो। झासँगै राष्ट्रिय मुक्ति पार्टीका अन्य केही नेता तथा कार्यकर्ताहरूले पनि रास्वपाको सदस्यता ग्रहण गरेका छन्।

राष्ट्रिय मुक्ति पार्टीमा केन्द्रीय उपाध्यक्षको जिम्मेवारी सम्हाल्दै आएका झा मधेश केन्द्रित राजनीतिक मुद्दामा सक्रिय रूपमा आवाज उठाउँदै आएका नेता हुन्। धनुषा–३ बाट प्रतिनिधिसभा सदस्यका उम्मेदवारसमेत रहेका उनले पछिल्लो राजनीतिक परिस्थिति, सुशासन र वैकल्पिक राजनीतिक शक्तिको आवश्यकता महसुस गर्दै रास्वपा रोजेको बताएका छन्।

कार्यक्रममा बोल्दै झाले देशमा पारदर्शिता, जवाफदेहिता र नीतिगत स्पष्टतासहितको राजनीतिक अभ्यास आवश्यक रहेको उल्लेख गरे। उनले जनताले अपेक्षा गरेको परिवर्तन संस्थागत गर्न नयाँ सोच र नयाँ नेतृत्व आवश्यक रहेको धारणा व्यक्त गरे। “देश र मधेशको समग्र विकासका लागि इमानदार राजनीतिक विकल्पको आवश्यकता छ,” उनले भने।

त्यसैगरी रास्वपाका उम्मेदवार मनिष झाले झाको आगमनले पार्टीलाई धनुषा जिल्लासहित मधेश प्रदेशमा थप मजबुती मिल्ने विश्वास व्यक्त गरे। उनले झाको राजनीतिक अनुभव, संगठन क्षमता र जनसम्पर्कले रास्वपाको आधार विस्तारमा महत्वपूर्ण भूमिका खेल्ने बताए।

राजनीतिक विश्लेषकहरूका अनुसार झाको रास्वपा प्रवेशले धनुषा क्षेत्र नम्बर ३ मा नयाँ राजनीतिक समीकरणको संकेत दिएको छ। विशेषगरी मधेश केन्द्रित दलबाट आएको नेतृत्व रास्वपामा समाहित हुनु अर्थपूर्ण रूपमा हेरिएको छ। यस कदमले आगामी निर्वाचन र स्थानीय राजनीतिक गतिविधिमा प्रत्यक्ष प्रभाव पार्न सक्ने आकलन गरिएको छ।

राष्ट्रिय मुक्ति पार्टीबाट रास्वपामा भएको यो प्रवेशलाई मधेश प्रदेशको राजनीतिमा एउटा महत्वपूर्ण घटनाका रूपमा लिइएको छ। पछिल्लो समय विभिन्न दलका नेता तथा कार्यकर्ताहरू वैकल्पिक राजनीतिक शक्तितर्फ आकर्षित भइरहेका सन्दर्भमा झाको निर्णयलाई पनि त्यसकै निरन्तरताको रूपमा हेरिएको छ।