मधेश प्रदेशका अध्यक्ष कलाम हुसैन खानद्वारा बाढीपीडितका लागि निजी रकमबाट २५ हजार सहयोग
आशिक हुसैन शेख दोहा, कतार ।
नेपालमा आएको विनाशकारी बाढी तथा प्राकृतिक विपद्बाट प्रभावित परिवारको राहत, उद्धार तथा पुनःस्थापनामा सहयोग पुर्याउने उद्देश्यले मधेश प्रदेश समन्वय परिषद् कतारका अध्यक्ष कलाम हुसैन खानले आफ्नो निजी रकमबाट २५ हजार नेपाली रुपैयाँ सहयोग गर्नुभएको छ।
रोजगारीको सिलसिलामा कतारमा रहनुभएका अध्यक्ष खानले आफ्नो कमाइबाट उक्त रकम बाढीपीडितका लागि सहयोग गर्नुभएको हो। विपद्को समयमा आर्थिक अवस्था कमजोर भएका तथा राहतको आवश्यकता रहेका पीडित परिवारलाई सहयोग पुग्ने उद्देश्यले आफूले व्यक्तिगत रूपमा सहयोग गरेको उहाँले बताउनुभएको छ।
कतारमा रहेको गैरआवासीय नेपाली संघ (एनआरएनए) राष्ट्रिय समन्वय परिषद् कतार (एनसीसी)मार्फत बाढीपीडितका लागि राहत रकम संकलन भइरहेको छ। संकलित राहत रकम नेपाल सरकारमार्फत प्रभावित क्षेत्रमा पुर्याउने अभियानअन्तर्गत अध्यक्ष खानले आफ्नो निजी रकम एनआरएनए राष्ट्रिय समन्वय परिषद् कतारको आधिकारिक खातामा पठाउनुभएको हो।
एनआरएनए राष्ट्रिय समन्वय परिषद् कतारका अध्यक्ष कृष्ण पन्तको नेतृत्वमा बाढीपीडितका लागि राहत तथा सहयोग संकलन अभियान सञ्चालन भइरहेको छ। सोही अभियानमा अध्यक्ष खानले व्यक्तिगत रूपमा गरेको यो सहयोग समावेश भएको हो।
मधेश प्रदेश समन्वय परिषद् कतारको अध्यक्षको जिम्मेवारीमा रहेर सामाजिक तथा मानवीय गतिविधिमा सक्रिय रहनुभएका खानले संगठनको तर्फबाट मात्र नभई आफ्नो निजी कमाइबाट समेत विपद्का बेला पीडित नेपालीहरूको साथमा उभिने प्रयास गर्नुभएको छ।
उहाँले बाढीपीडित नेपाली नागरिकको दुःखमा आफू पनि सहभागी रहेको बताउँदै आगामी दिनमा समेत आफ्नो क्षमताअनुसार थप सहयोग गर्ने प्रतिबद्धता व्यक्त गर्नुभएको छ। विपद्को समयमा विदेशमा रहेका नेपालीहरू एकजुट भएर पीडितको राहत तथा उद्धारमा सहयोग गर्नुपर्नेमा समेत उहाँले जोड दिनुभएको छ।
नेपालका विभिन्न क्षेत्रमा बाढी तथा प्राकृतिक विपद्का कारण ठूलो जनधनको क्षति भएको अवस्थामा कतारमा रहेका नेपाली समुदायबाट राहत तथा सहयोग संकलन गर्ने अभियान सञ्चालन भइरहेको छ। सोही अभियानमा अध्यक्ष खानको व्यक्तिगत योगदानले मानवीय सेवाप्रतिको जिम्मेवारी र विपद्मा परेका नेपालीहरूप्रतिको ऐक्यबद्धताको सकारात्मक सन्देश दिएको छ।
बाढीपीडितको राहत तथा उद्धारका लागि गरिएको यस सहयोगले प्रभावित परिवारसम्म राहत पुर्याउने अभियानमा थप योगदान पुग्ने विश्वास गरिएको छ।
