यमनबाट इजिप्टेली जलयात्री बोकेको तेल ट्यांकर अपहरण, कतारद्वारा कडा निन्दा

आशिक हुसैन शेख दोहा कतार- कतार सरकारले यमनको समुद्री क्षेत्रबाट इजिप्टेली जलयात्रीहरू सवार एउटा तेल ट्यांकर अपहरण गरिएको घटनाको कडा निन्दा गरेको छ। अपहरणपछि उक्त ट्यांकरलाई सोमालियाको पन्टल्यान्ड क्षेत्र नजिकको समुद्री क्षेत्रमा लगिएको बताइएको छ।

कतारको विदेश मन्त्रालयले एक आधिकारिक विज्ञप्ति जारी गर्दै यस घटनालाई अन्तर्राष्ट्रिय कानुनको गम्भीर उल्लंघन भएको उल्लेख गरेको छ। मन्त्रालयले यस्तो गतिविधिले अन्तर्राष्ट्रिय समुद्री सुरक्षा, व्यापार मार्ग र क्षेत्रीय स्थायित्वमा गम्भीर खतरा उत्पन्न गर्ने चेतावनी दिएको छ।

यस घटनामा ट्यांकरमा रहेका इजिप्टेली जलयात्रीहरूको अवस्थाबारे अझै स्पष्ट विवरण सार्वजनिक भएको छैन। तर कतारले उनीहरूको सुरक्षाप्रति गहिरो चिन्ता व्यक्त गर्दै शीघ्र रिहाइका लागि आवश्यक सबै पक्षलाई पहल गर्न आग्रह गरेको छ।

कतारले इजिप्ट सरकार तथा अपहरणमा परेका जलयात्रीहरूको परिवारप्रति ऐक्यबद्धता जनाउँदै उनीहरूको सुरक्षित फिर्तीका लागि अन्तर्राष्ट्रिय सहयोग आवश्यक रहेको बताएको छ।

साथै, कतारले अन्तर्राष्ट्रिय जलमार्गहरूमा बढ्दो सुरक्षा चुनौतीप्रति चिन्ता व्यक्त गर्दै विश्व समुदायलाई समुद्री सुरक्षालाई मजबुत बनाउन संयुक्त तथा प्रभावकारी कदम चाल्न आह्वान गरेको छ।