मधेशमा पत्रकार तालिम विवाद : महासंघद्वारा प्राधिकरणको कार्यशैलीप्रति आपत्ति

जनकपुरधाम, वैशाख १५ — नेपाल पत्रकार महासंघ मधेश प्रदेशअन्तर्गतका जिल्ला शाखाहरूले संयुक्त विज्ञप्ति जारी गर्दै प्रदेश सरकार मातहतको आमसञ्चार प्राधिकरणको कार्यशैलीप्रति गम्भीर असन्तुष्टि व्यक्त गरेका छन्।

महासंघले सञ्चारमाध्यम तथा सञ्चारकर्मीहरूको क्षमता अभिवृद्धिका नाममा सञ्चालन गरिएका कार्यक्रमहरूमा समन्वयको अभाव, पारदर्शिताको कमी तथा संस्थागत प्रक्रियाको बेवास्ता भएको आरोप लगाएको छ। विशेषगरी स्थानीय तहमा पत्रकारिता प्रशिक्षणका लागि सञ्चालन गरिएको तीन दिने आवासीय तालिम कार्यक्रमलाई लिएर विवाद चर्किएको हो।

विज्ञप्तिअनुसार प्रारम्भमा जिल्ला शाखाहरूसँग प्रशिक्षक पत्रकारहरूको नामावली माग गरिए पनि त्यसपछि महासंघसँग कुनै समन्वय नगरी एकतर्फी रूपमा सूचना प्रकाशन गर्दै आवेदन आह्वान गरिएको बताइएको छ। यसलाई महासंघले संस्थागत मर्यादाविपरीत कार्यको रूपमा व्याख्या गरेको छ।

महासंघका अनुसार चैत १७ गतेसम्म मधेशका आठ जिल्लाबाट ५४ जना पत्रकारहरूको नामावली संकलन गरिएको थियो। तर त्यसपश्चात् प्रक्रिया अघि बढाउँदा महासंघलाई पूर्ण रूपमा बेवास्ता गरिएको आरोप लगाइएको छ। साथै, चैत २५ गते विवरण पेश गर्न सम्बन्धी सूचना जारी गरिनु समन्वय अभावको थप प्रमाण भएको महासंघको दाबी छ।

विज्ञप्तिमा यस्ता गतिविधिहरूले महासंघको भूमिका र गरिमामाथि प्रश्न उठाएको उल्लेख गर्दै विगतमा सञ्चालन गरिएका तालिमहरूमा पनि स्थानीय पत्रकारहरूको वास्तविक आवश्यकता र सहभागितालाई बेवास्ता गरिएको अनुभव दोहोरिएको जनाएको छ।

महासंघले आगामी दिनमा यस्ता कार्यक्रम सञ्चालन गर्दा अनिवार्य रूपमा आफ्ना जिल्ला शाखाहरूसँग समन्वय र सहकार्य गर्न सम्बन्धित निकायलाई आग्रह गरेको छ। साथै प्रदेश सरकारबाट विनियोजित बजेटको पारदर्शिता र प्रभावकारिता सुनिश्चित गर्न समेत ध्यानाकर्षण गराइएको छ।

अन्त्यमा, सञ्चार क्षेत्रको दिगो विकासका लागि सहभागिता, सम्मान र सहकार्य अपरिहार्य हुने उल्लेख गर्दै महासंघले यस्ता गतिविधिहरू तत्काल सच्याउन सरोकारवाला पक्षसँग माग गरेको छ।