महोत्तरीका अधिकांश स्थानीय तहमा विद्यालय विदा, चिसो नघटे विदा थपिने सम्भावना
महोत्तरी टुडे डेस्क महोत्तरी- महोत्तरी जिल्लामा पछिल्लो केही दिनदेखि निरन्तर बढ्दै गएको चिसो र शीतलहरका कारण जनजीवन प्रभावित बनेको छ। अत्यधिक चिसोका कारण विशेषगरी बालबालिका, वृद्धवृद्धा तथा बिरामीहरू बढी जोखिममा परेपछि जिल्लाका विभिन्न स्थानीय तहहरूले विद्यालय बन्द गर्ने निर्णय गरेका छन्।
विद्यार्थीहरूको स्वास्थ्यमा प्रतिकूल असर पर्न सक्ने सम्भावनालाई मध्यनजर गर्दै सोनमा गाउँपालिका, बलवा नगरपालिका, लोहारपट्टी नगरपालिका, जलेश्वर नगरपालिका, महोत्तरी गाउँपालिका तथा सम्सी गाउँपालिकाले सामुदायिक, संस्थागत तथा धार्मिक विद्यालयहरूमा पठन–पाठन कार्य स्थगित गरेका हुन्।
सोनमा गाउँपालिकाको निर्णय
सोनमा गाउँपालिकाले जारी गरेको आधिकारिक सूचनाअनुसार जिल्लामा चिसो अत्यधिक बढेकाले प्रतिकूल मौसमको असरबाट विद्यार्थीहरूलाई जोगाउन मिति २०८२/९/९ गतेदेखि २०८२/९/११ गते शुक्रबारसम्म गाउँपालिका अन्तर्गत सञ्चालित सबै विद्यालयहरू बन्द रहने निर्णय गरिएको छ। गाउँपालिकाले यो अवधि चिसोको अवस्थालाई मूल्यांकन गर्दै आवश्यक परे थप विदा दिन सकिने जनाएको छ।
अन्य स्थानीय तहको अवस्था,
त्यसैगरी बलवा, लोहारपट्टी र जलेश्वर नगरपालिकासहित महोत्तरी र सम्सी गाउँपालिकाले पनि विद्यालय विदा दिने निर्णय गरेका छन्। स्थानीय तहका शिक्षा शाखाहरूले चिसोको प्रभाव कम नहुँदासम्म विद्यालय सञ्चालन नगर्न विद्यालय प्रशासनलाई निर्देशन दिएका छन्।
चिसोको प्रभाव,
महोत्तरीसहित मधेश प्रदेशका विभिन्न जिल्लामा बिहान र बेलुका बाक्लो हुस्सु लाग्ने, तापक्रम अत्यधिक घट्ने तथा शीतलहर चल्ने अवस्था देखिएको छ। यसले दैनिक जनजीवन प्रभावित हुनुका साथै बालबालिकामा रुघाखोकी, ज्वरो, निमोनिया लगायतका स्वास्थ्य समस्या बढ्ने जोखिम रहेको स्वास्थ्यकर्मीहरू बताउँछन्।
स्थानीय तहको आग्रह,
स्थानीय सरकारहरूले अभिभावकहरूलाई बालबालिकालाई अत्यावश्यक कामबाहेक घरबाहिर ननिस्कन, न्यानो लुगा प्रयोग गर्न तथा स्वास्थ्यमा कुनै समस्या देखिए नजिकको स्वास्थ्य संस्थामा सम्पर्क गर्न आग्रह गरेका छन्। साथै विद्यालयहरूलाई समेत चिसोको अवस्था सहज भएपछि मात्र पठन–पाठन सुरु गर्न निर्देशन दिइएको छ।
स्थानीय तहहरूले चिसोको अवस्था निरन्तर अनुगमन गरिरहेको जनाउँदै मौसम अझै प्रतिकूल रहेमा विदा अवधि थप विस्तार गरिने स्पष्ट पारेका छन्।
