सुन्दर र स्वस्थ्य सोनमा गाउँपालिका — हाम्रो अभियान” : अध्यक्ष यादवको पहलमा सरसफाइ अभियान तीव्र

महोत्तरी टुडे ,धर्मेन्द्र कुमार यादव-

महोत्तरी जिल्लाको सोनमा गाउँपालिका, सुन्दर र स्वस्थ्य सोनमा गाउँपालिका—हाम्रो अभियान” भन्ने नारासहित सोनमा गाउँपालिकाका अध्यक्ष बिशेश्वर प्रसाद यादवको नेतृत्वमा व्यापक सरसफाइ अभियान सुरु गरिएको छ। गाउँलाई स्वच्छ, सुरक्षित र स्वास्थ्यमैत्री बनाउने उद्देश्यका साथ सुरु गरिएको यो अभियानमा स्थानीय बासिन्दाको उत्साहजनक सहभागिता देखिएको छ।

गाउँपालिकाको अनुसार हालसम्म वडा नं. १, २, ७ र ८ का सम्पूर्ण सडक, गल्ली र सार्वजनिक स्थलहरूको सरसफाइ पूरा भइसकेको छ भने वडा नं. ३ मा अभियान जारी छ। बाँकी वडाहरूमा पनि क्रमशः विस्तार गर्ने तयारी भइरहेको गाउँपालिकाले जनाएको छ।

गाउँपालिकाका अध्यक्ष यादव स्वयं स्थलगत अनुगमन गर्दै अभियानको प्रगति मूल्यांकन गर्दै आउनुहुन्छ। उहाँले स्थानीय बासिन्दा, वडा अध्यक्ष र नगर प्रहरीको सहयोगको प्रशंसा गर्दै भन्नुभयो—

“सफा वातावरणले मात्र स्वस्थ्य समाज सम्भव हुन्छ। सरसफाइले रोग नियन्त्रण गर्छ, दुर्घटना घटाउँछ, र हाम्रो गाउँलाई सुन्दर बनाउँछ। यो अभियान सबैको जिम्मेवारी हो।”

यो अभियान दिपावली र छठ पर्वलाई लक्षित गरी सञ्चालन गरिएको हो। पर्वका बेला यात्रु, पाहुना र श्रद्धालुहरूको भीड बढ्ने भएकाले गाउँलाई सफा र आकर्षक बनाउने प्रयास गरिएको हो।

नगर प्रहरीको पनि यसमा विशेष योगदान रहेको छ। प्रहरी टोलीहरू हरेक वडामा सरसफाइ टोलीसँगै रहेर सडक र सार्वजनिक स्थल सफा गर्न सक्रिय छन्।

गाउँपालिकाको स्वास्थ्य शाखाका अनुसार, यस अभियानले मच्छरजन्य र दूषित पानीबाट फैलिने डेंगु, टाइफाइड, झाडापखाला, हैजाजस्ता रोगहरू नियन्त्रणमा मद्दत गर्ने विश्वास गरिएको छ।

वडा नं. ८ का रामबाबु यादव भन्छन् —

“पहिले हाम्रो गल्ली फोहरले ढाकिएको थियो, अहिले सफा र सुन्दर देखिन्छ। यस्तो अभियानले गाउँको रूप नै फेरिदियो।”

वडा नं. २ की सुनीता देवी भन्छिन् —

“गाउँपालिकाले पहिलो पटक यस्तो ठूलो अभियान चलाएको देख्यौं। अहिले धुलो हटेपछि सास फेर्न पनि सजिलो भएको छ।”

वडा नं. ३ का युवा नरेश साह भन्छन् —

“अध्यक्ष यादवको पहलले गाउँमा परिवर्तन आएको छ। हामी युवाहरू पनि सरसफाइ टोलीमा सक्रिय छौं, यो निरन्तर चलोस् भन्ने चाहना छ।”

वडा नं. ७ का वडा अध्यक्ष इन्द्रजित यादवका अनुसार —

“यो अभियानले गाउँबासीलाई जिम्मेवार बनाएको छ। सरसफाइ अब सरकारी होइन, सबैको साझा दायित्व हो।”

अध्यक्ष यादवको सन्देश

“सफा सोनमा हाम्रो पहिचान हो। सबै मिलेर यो अभियानलाई निरन्तरता दिऔँ, र हाम्रो गाउँलाई स्वास्थ्य, सुन्दरता र समृद्धिको उदाहरण बनाऔं।”

सोनमा गाउँपालिकाको यो सरसफाइ अभियानले गाउँको रूपरङ्ग मात्र होइन, मानसिकता परिवर्तन गर्ने अभियानको रूपमा रूप लिँदैछ। स्थानीयवासीहरूले यसलाई गर्वको विषयका रूपमा लिएका छन्।