गौशाला बजारमा ११ हजार कन्याद्वारा भव्य कलश शोभा यात्रा सम्पन्न
धर्मेन्द्र कुमार यादव, महोत्तरी – महोत्तरी टुडे समाचारदाता
धार्मिक उल्लासमा डुब्यो गौशाला बजार।
महोत्तरीको गौशाला बजार आज बिहान घटस्थापनाको अवसरमा धार्मिक उल्लासले भरिएको थियो । बिहान ९ बजेदेखि सुरु भएको कलश शोभा यात्रामा करिब ११ हजार कुमारी कन्याहरूको सहभागिता रह्यो ।
परम्परागत वेशभूषा, धार्मिक भजन–कीर्तन, बाजागाजा र फूलमालाले सजिएको शोभा यात्राले सम्पूर्ण बजारलाई आध्यात्मिक र भक्तिमय बनाएको थियो । कन्याहरूले कलश बोकेर नगर परिक्रमा गरेका थिए भने स्थानीय बासिन्दा, विद्यालय, संघ–संस्था र धार्मिक प्रतिष्ठानहरूको सक्रिय उपस्थितिले कार्यक्रमलाई झनै भव्य बनाएको थियो ।
गौरीघाटमा कलशा भराइ।
गौशाला बजार परिक्रमा गरि शोभा यात्रमा सहभागी कन्याहरू मरहा नदीको गौरीघाट पुगेका थिए । त्यहाँ धार्मिक विधिअनुसार कलशा भराइ (पवित्र जल कलशमा भर्ने प्रक्रिया) सम्पन्न गरियो । श्रद्धालु कन्याहरूले नदीको जललाई पवित्र मान्दै कलशमा भरेर देवी दुर्गाको आवाहन गरेका थिए । यो परम्परा नवरात्रिको विशेष आकर्षणका रूपमा स्थापित हुँदै आएको छ ।
सामूहिक जलभोज र धार्मिक क्रियाकलाप।
कलशा भराइ सम्पन्न भएपछि गौरीघाटमै सामूहिक जलभोज (भण्डारा) आयोजना गरियो । भक्तजनहरूले स्नान तथा पूजा–अर्चना गरी हजारौं संख्यामा भेला भई प्रसाद ग्रहण गरेका थिए । स्थानीय दानवीर, समाजसेवी तथा धार्मिक संघ–संस्थाको सहयोगमा सम्पन्न भण्डाराले वातावरणलाई अझ भक्तिमय बनाएको थियो ।
सुरक्षा व्यवस्था र मेलाको तयारी।
गौशाला बजार क्षेत्रमा सुरक्षा व्यवस्था कडा गरिएको जिल्ला प्रहरी कार्यालय महोत्तरीले जनाएको छ । मेलामा सहभागी भक्तजनलाई सहज र सुरक्षित वातावरण उपलब्ध गराउन पर्याप्त प्रहरी र स्वयंसेवक परिचालन गरिएको थियो ।
यसैबीच, मेला समितिले तयारी तीव्रगतिमा भइरहेको जनाउँदै यस वर्ष धार्मिक क्रियाकलापसँगै नाचगान कार्यक्रम र झिझिया प्रतियोगिता समेत आयोजना हुने जानकारी दिएको छ । समितिले भनेको छ, “कलश शोभा यात्रा, कलशा भराइ र जलभोजसँगै सांस्कृतिक कार्यक्रम जोडिएकाले यसपटकको नवरात्रि मेला अझै ऐतिहासिक बन्नेछ ।”
