गैरआवासीय नेपाली संघ राष्ट्रिय समन्वय परिषद कतारद्वारा श्रद्धाञ्जली सभा सम्पन्न

आशिक हुसैन शेख, दोहा (कतार) — गैरआवासीय नेपाली संघ (एनआरएनए) राष्ट्रिय समन्वय परिषद कतारले भाद्र २३ र २४ गते नेपालमा भएको ‘जेन–जि आन्दोलन’का क्रममा शहीद भएका सम्पूर्ण वीर युवाहरूको स्मृतिमा श्रद्धाञ्जली सभा आयोजना गरेको छ। उक्त कार्यक्रम असोज १ गते बुधबारका दिन कतारको राजधानी दोहास्थित मुन्ताजा, गोर्खाली रेस्टुरेन्टको सभा हलमा सम्पन्न भएको हो।

कार्यक्रमको सुरुवात एक मिनेट मौनधारण गरेर शहीदहरूको स्मरण गर्दै गरिएको थियो। त्यसपछि नेपाली राष्ट्रिय गान बजाइयो र शहीदहरूको तस्वीरमा फूलमाला अर्पण गरी श्रद्धाञ्जली अर्पण गरियो। साथै मोमबत्ती प्रज्वलन गर्दै दिवंगत आत्माको चिरशान्ति र आन्दोलनका क्रममा घाइते भएकाहरूको शीघ्र स्वास्थ्य लाभको कामना सहभागीहरूले एकसाथ व्यक्त गरे।

कार्यक्रमको प्रारम्भमा द्वितीय उपाध्यक्ष संतोष पौडेलले स्वागत मन्तव्य दिँदै सभाको उद्देश्य र महत्वबारे जानकारी गराए। उनले शहीदहरूको बलिदानलाई सम्झनु सम्पूर्ण नेपालीहरूको साझा जिम्मेवारी भएको उल्लेख गरे।

कानुनी सल्लाहकार रमजान अली मियाँले आफू पनि नेपालमा प्रत्यक्ष रूपमा जेन–जि आन्दोलनमा सहभागी भएको स्मरण गरे। उनले प्रहरी दमन र युवाहरूको बलिदान आफ्नै आँखाले देखेको बताउँदै, “यो आन्दोलन भ्रष्टाचार, घुसपैठ र अन्यायविरुद्धको ऐतिहासिक क्रान्ति हो,” भने। उनले प्रवासी नेपालीहरूले पनि देशमा हुने अन्याय–अत्याचारविरुद्धको आवाजलाई समर्थन गर्नुपर्नेमा जोड दिए।

पदाधिकारीहरूको भनाइ

यस अवसरमा बोल्दै एनआरएनए राष्ट्रिय समन्वय परिषद कतारका अध्यक्ष कृष्ण पन्थीले शहीदहरूको बलिदानलाई बिर्सन नहुने बताउँदै नेपालमा परिवर्तन र अधिकारका लागि भएको जेन–जि आन्दोलनलाई प्रवासी नेपालीहरूले पनि भावनात्मक समर्थन गर्ने बताए।

अध्यक्ष पन्थीले आन्दोलनको गहिरो सन्देशबारे धारणा राख्दै भने—

“जेन–जि आन्दोलन केवल विरोध प्रदर्शन मात्र होइन, यो देशलाई गाँजेको भ्रष्टाचार र रोटी सेक्ने प्रवृत्तिविरुद्धको चेतना हो। शहीदहरूले देखाएको बलिदानलाई इतिहासले कहिल्यै भुल्ने छैन।”

प्रथम उपाध्यक्ष रबिन मगरले लोकतन्त्र र नागरिक अधिकारको संरक्षणमा युवाहरूको योगदान ऐतिहासिक रहेको उल्लेख गर्दै आन्दोलनमा जीवन गुमाउने शहीदहरूलाई श्रद्धाञ्जली अर्पण गरे।

द्वितीय उपाध्यक्ष संतोष पौडेलले प्रवासमा रहेर पनि मातृभूमिको पीडा अनुभव गर्न सकिन्छ भन्दै शहीद परिवारप्रति संवेदना व्यक्त गरे।

त्यस्तै, तृतीय उपाध्यक्ष जागिर आलम, युवा उपाध्यक्ष मेहर सिंह तामाङ, महासचिव बिबेक पुलामी मगर, सचिव अर्जुन संगौला, प्रमुख सल्लाहकार रमेश भट्ट, सल्लाहकार संतोष क्षेत्री, कानुनी सल्लाहकार रमजान अली मियाँ, सल्लाहकार नियाज शेख, सल्लाहकार ठाकुर कुमार परिवार, सल्लाहकार तुलसी राम, सल्लाहकार सुसिल कुमार लगायतले समेत शहीदहरूको बलिदानलाई इतिहासमा सदैव अमर रहने बताएका थिए।

कार्यक्रममा प्रदेश संस्थाका प्रतिनिधिहरू र जिल्ला संस्थाका प्रतिनिधिहरू समेत उपस्थित भएका थिए। उनीहरूले प्रवासी नेपालीहरूको साझा भावनाबाट मातृभूमिको आन्दोलनलाई समर्थन गर्दै शहीदहरूप्रति सम्मान प्रकट गरेका थिए।

कार्यक्रममा संघका पदाधिकारीहरूसँगै कतारमा रहेका बुद्धिजीवी, समाजसेवी, महिला प्रतिनिधि तथा अन्य दर्जनौं नेपालीहरूको सक्रिय सहभागिता रहेको थियो। सभा हल भरिभराउ हुने गरी उपस्थित भएका सहभागीहरू भावुक देखिएका थिए। उपस्थितहरूले “शहीदहरूको रगतले न्याय र परिवर्तनको बाटो देखाएको छ” भन्दै निरन्तर संघर्षको आवश्यकता औंल्याएका थिए।

दोहामा सम्पन्न यस श्रद्धाञ्जली सभाले प्रवासी नेपालीहरू मातृभूमिप्रतिको गहिरो निष्ठा र भावनात्मक ऐक्यबद्धता प्रकट गरेको छ। वक्ताहरूले शहीदहरूको सपना अधुरो नराख्ने संकल्प गर्दै भ्रष्टाचारमुक्त र न्यायपूर्ण नेपाल बनाउन एकजुट हुने प्रतिज्ञा गरेका थिए।

गैरआवासीय नेपाली संघ राष्ट्रिय समन्वय परिषद कतारले आयोजना गरेको यस श्रद्धाञ्जली सभाले प्रवासमा रहेका नेपालीहरू मातृभूमिप्रतिको आत्मीयता र जिम्मेवारीबोध प्रकट गरेको छ। सहभागीहरूले शहीदहरूको सपना साकार पार्नुपर्ने प्रतिबद्धता जाहेर गर्दै कार्यक्रम सम्पन्न भएको थियो।

यो पनि पढ्नुहोस् 👇

नेपालमा नयाँ अन्तरिम सरकार गठन, तर मधेशी उपेक्षा — प्रवासी नेपालीको गुनासो

नेपालमा हालै नयाँ अन्तरिम सरकार गठन भएको छ तर त्यसमा मधेशको कोटाबाट कुनै मन्त्री समावेश नगरिएको विषयलाई लिएर मधेशी समुदायबीच तीव्र असन्तोष व्यक्त भइरहेको छ। मधेशी समुदायका नेताहरू र बुद्धिजीवीहरूले यसलाई फेरि एक पटक “मधेशप्रति भएको उपेक्षा” को उदाहरणका रूपमा लिएका छन्।

मधेशमा लामो समयदेखि समानता र अधिकारका लागि संघर्ष हुँदै आएको भए पनि सत्ता–संरचनामा प्रतिनिधित्व पाउन नसक्नु विडम्बना भएको उनीहरूको भनाइ छ। कतिपयले यो अवस्थाले मधेशी जनताको असन्तोष अझ चर्काउने चेतावनीसमेत दिएका छन्।

यो विषय प्रवासमा रहेका नेपाली समाजभित्र पनि उठेको छ। गैरआवासीय नेपाली संघ (एनआरएनए) राष्ट्रिय समन्वय परिषद कतारले असोज १ गते दोहाको मुन्ताजास्थित गोर्खाली रेस्टुरेन्टमा आयोजना गरेको जेन–जि आन्दोलनका शहीदहरूलाई श्रद्धाञ्जली कार्यक्रममा समेत यस विषयमा गुनासो व्यक्त गरिएको थियो।

कार्यक्रममा करिब चार–पाँच जना मात्र मधेशीहरूको उपस्थिति रहेको प्रसंग उल्लेख गर्दै सहभागीहरूले भने — “नेपालमा मधेशलाई बेवास्ता गर्ने प्रवृत्ति यथावत छ, त्यस्तै यहाँ प्रवासमा पनि मधेशीहरूको उपस्थिति न्यून देखिन्छ। दुबै स्तरमा समानताको खाँचो स्पष्ट देखिन्छ।”

नयाँ सरकार गठन भए पनि मधेशलाई उचित प्रतिनिधित्व नदिएको गुनासो बलियोसँग उठिरहेको छ। एनआरएनए कतारको श्रद्धाञ्जली कार्यक्रममा समेत मधेशी समुदायको न्यून उपस्थिति र मातृभूमिमा भइरहेको उपेक्षाप्रति असन्तोष प्रकट गरिएको छ। यसले मधेशी जनताको असन्तुष्टि अझ गहिरो बनाएको देखिन्छ।