श्रावणको अन्तिम सोमबार टुटेश्वरनाथ महादेव मन्दिरमा भक्तजनको भीड

बर्दिवास महोत्तरी– श्रावण महिनाको अन्तिम सोमबारको अवसरमा बर्दिवास–०५ स्थित टुटेश्वरनाथ महादेव मन्दिरमा बिहानैदेखि भक्तजनहरूको भीड लागेको छ। शिवभक्तहरूले पूजा–अर्चना, दुग्धाभिषेक र विभिन्न विधि–विधानसहित भगवान महादेवको आराधना गरेका छन्।

मधेश प्रदेशको महोत्तरी जिल्ला लगायतका स्थानीयसँगै आसपासका गाउँ र सहरबाट आएका भक्तजनहरूले धार्मिक वातावरणलाई उल्लासमय बनाएका थिए। मन्दिर परिसरमा शिव नामको जयघोष गुन्जिएको थियो भने विभिन्न धार्मिक गीत र भजनले वातावरण अझै आध्यात्मिक बनेको थियो।

मन्दिर व्यवस्थापन समितिले दर्शनका लागि आवश्यक व्यवस्था मिलाएको र सुरक्षाकर्मीहरू खटाएर भक्तजनको सहज आवागमन सुनिश्चित गरेको जनाएको छ। धार्मिक विश्वासअनुसार, श्रावण महिनाको सोमबार महादेवको दर्शन तथा पूजाअर्चना गर्दा मनोकामना पूरा हुने जनविश्वास रहेको छ।